L' autre chose qui m' estonne encore d' avantage, c' est, posé que le mespris que le chevalier luy mesme nous a faict plusieurs fois de ce poëme-cy, vous eust donné juste occasion de doute ; et supposé que la modestie dont vous faictes si estroicte profession, vous empeschast de vous en rapporter à vous mesme, et vous fist défier de ce fort jugement à qui les plus judicieux se remettent si volontiers ; en somme qu' il y eust grand lieu de craindre et de douter, c' est dis-je de voir qu' entre tant de personnes habiles qui vous estiment et dont vous disposez, vous ayez voulu jetter les yeux sur une telle foiblesse que la mienne, pour en desirer, et pour en esperer aucune bonne resolution ; c' est bien la une chose dont je ne crois pas que vous vous puissiez purger.
